Shqipëri, zbulohet një anije me 808 kilogramë drogë

Droga po transportohej në një furgon drejt detit, ndërsa gomonia me ajër ishte gati për ta transportuar atë në Itali

Dy shtetas shqiptarë janë zbuluar nga policia e Shqipërisë, derisa po mundoheshin që nëpërmjet detit me një gomone ajri, të transportonin në Itali një sasi prej 808 kilogramësh drogë të llojit kanabis-sativa. Njëri prej tyre u zu në Radhimë, ndërsa tjetri i njohur për policinë arriti të arratisej.

Shtetasi shqiptar i arrestuar është i moshës 48 vjeç, ndërsa bashkëpunëtori i tij i arratisur është i moshës 42 vjeç.

Droga po transportohej në një furgon drejt detit, ndërsa gomonia ishte gati për ta transportuar atë në Itali. Brenda mjetit lundrues janë konstatuar 5 bidonë me karburant, që dëshmon se plani ishte i gatshëm për transport deri në Itali, raporton shekulli.

Nga kontrolli në afërsi të mjetit lundrues, pranë një restoranti u gjetën 7 çanta të hedhura në bregun e detit, brenda të cilave kishte lëndë narkotike kanabis-sativa. Droga ishte e ndarë në 40 pako të mbështjella me letër plastike të tejdukshme. Kjo drogë prodhohet në Shqipëri.