Shqipëri: Vërshime të mëdha, ujërat rrëmbejnë dy persona

Policia e Shqipërisë ka dhënë njoftim zyrtar në lidhje me ngjarjen e ndodhur vendin e quajtur “Grykë Lugje”, në njësinë administrative Shkrel, Malësi e Madhe, ku uji ka marrë përpara një makinë.
Sipas autoriteteve, në automjet ndodheshin tre persona, banorë të zonës, babai, djali dhe vajza.

Në momentin që rrjedha e ujit ka marrë përpara automjetin që drejtohej nga Pjetër Rushaj rreth 50 vjeç, vajza ka mundur të dalë dhe është ndihmuar nga një banor i zonës.

Bëhet e ditur se vajza ndodhet jashtë rrezikut për jetën, ndërsa babanë e vajzës dhe vëllanë e saj i ka marrë rrjedhja e ujit.
Në vendngjarje ndodhen polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, të cilët po punojnë për gjetjen e dy shtetasve (babë e bir).