Shqipëri: Sali Berisha, në prag të arrestimit

Këshilli i Mandateve në Shqipëri i dha autorizimin Prokurorisë së Posaçme që t’i paraqesë gjykatës kërkesë arresti për Sali Berishën.

Arben Kraja dhe Irena Millonai shkuan përpara deputetëve për të prezantuar kërkesën për ashpërsimin e masës së sigurisë ndaj Sali Berishës. Argumenti i tyre i vetëm ishte refuzimi që Berisha i kishte bërë drejtësisë dy muajt e fundit.

“Kemi ardhur këtu pasi personi në hetim nuk ka zbatuar në mënyrë të përsëritur vendimet e gjykatave”, tha Arben Kraja, transmeton A2, përcjell albinfo.ch.

Këtyre akuzave Sali Berisha zgjodhi që t’u përgjigjej nëpërmjet avokatëve të tij.

“Nuk ka asnjë çështje korrupsioni në gjykatat shqiptare, ku organi i akuzës me gjithë këtë këmbëngulje që bën të tregojë se kush e korruptoi zotin Berisha”, tha avokati i Berishës.

Vendimarrja e Këshillit të Mandateve do të shkojë për votim të enjten në Parlament, ku edhe aty miratimi kërkesës duket thjesht procedurë. Por pavarësisht kësaj, Berisha është i bindur se SPAK ka shkelur procedurat ligjore dhe pret një vendimmarrje nga Gjykata Kushtetuese.