Shqipëri: Ngjarje e rëndë, 12-vjeçarja mbeti shtatzënë pas abuzimit seksual nga një 70-vjeçar

Një ngjarje e rëndë është bërë publike këtë të martë në fshatin Piskupat të Pogradecit, ku një vajzë 12-vjeçare ka rezultuar shtatzënë pas një kontrolli mjekësor në spitalin e Korçës.

Sipas informacioneve paraprake, e mitura dyshohet se është abuzuar seksualisht me forcë nga një burrë rreth 70 vjeç, person i njohur për familjen e saj. Rasti është zbuluar pasi prindërit kanë vënë re ndryshime fizike te vajza dhe e kanë dërguar për ekzaminim mjekësor, ku u konfirmua se ajo ishte rreth 22 javëshe shtatzënë.

Burime nga hetimi bëjnë me dije se i dyshuari e kishte kërcënuar vazhdimisht të miturën për të mos treguar ngjarjen. Pas denoncimit, policia ka ndërhyrë dhe ka arrestuar 70-vjeçarin.

Aktualisht, autoritetet po vijojnë veprimet hetimore, ndërsa familjarët janë marrë në pyetje. E mitura ka dhënë dëshminë e saj në prani të një psikologu. Sipas të dhënave, abuzimi dyshohet të ketë ndodhur në banesën e të arrestuarit.

Hetimet po vijojnë për zbardhjen e plotë të rrethanave të kësaj ngjarjeje të rëndë.