Shqipëri: Bie numri i shtetasve shqiptarë dhe të huaj që vizituan vendin

Kufizimi që po ndërmarrin të gjitha vendet e botës për të ulur transmetueshmërinë e virusit Sars-Cov-2 ka ulur ndjeshëm numrin e turistëve apo vizitorëve.

Numri i shtetasve shqiptarë dhe të huaj që hynë në vendin tonë gjatë dy muajve të parë të këtij viti shënoi rënie me 28,2 %, në krahasim me të njëjtën periudhë të vitit 2020, transmeton Atsh, përcjell Albinfo.ch.

Sipas INSTAT, numri i shtetasve të huaj të hyrë në Shqipëri gjatë dy muajve të parë të 2021 është 343.502.

Gjatë dymujorit të parë të 2021, ndër vendet që kanë hyrjet më të larta të shtetasve në Shqipëri, Zvicra ka pasur rritjen më të madhe me 24,5 % dhe Kosova me 9,8 %, ndërsa uljen më të ndjeshme e ka pasur Greqia me 87,3 % dhe Anglia me 74,7 %, krahasuar me të njëjtën periudhë të vitit 2020.

Daljet e shtetasve shqiptarë dhe të huaj nga territori i Shqipërisë, gjatë 2-mujorit të këtij viti janë 822.288 duke shënuar një rënie prej 44,5 %, krahasuar me të njëjtën periudhë të një viti më parë.

Ndërsa numri i shtetasve shqiptarë të dalë nga territori i Shqipërisë gjatë dy muajve të parë të 2021, është 500.637 duke rënë 45,9 %, krahasuar me të njëjtën periudhë të një viti më pare.

Për biznes drejt Shqipërisë gjatë këtij 2-mujori udhëtuan mbi 14600 shtetas të huaj.