Shpërthimi në Kçiq, kryetari i Mitrovicës: Të lënduarit i përkasin të njëjtës familje, ka edhe nga diaspora

Shërbimi Spitalor Klinik dhe Universitar i Kosovës, ka njoftuar se në Qendrën Klinike Universitare të Kosovës janë duke u trajtuar 13 pacientë si pasojë e djegieve nga shpërthimi i bombolës së gazit në fshatin Kçiç të Mitrovicës.

Sipas njoftimit, pacientët kanë djegie të shkallës së dytë dhe të tretë, në gjymtyrë të ndryshme të trupit, përfshirë, fytyrë, duar, këmbë dhe pjesë të tjera të trupit, ndërsa u bë e ditur se 4 prej tyre janë duke u operuar, përcjell albinfo.ch.

Në lidhje me këtë, kryetari i Mitrovicës, Bedri Hamza, ka thënë se të lënduarit, në bazë të informatave janë nga e njëjta familje.

“Isha edhe brenda. Sipas informatave ka prej tyre që e kanë shkallën e lëndimit më të madhe, e disa më të vogël. Uroj që të gjithë të jenë mirë e të mos kenë rrezik për jetë e iu uroj shërim të shpejt dhe shfrytëzoj rastin t’i falënderoj mjekët për një punë dhe përkushtim të jashtëzakonshëm”, ka deklaruar Hamza për Klan Kosovën.

Tutje Hamza ka thënë se nga të lënduarit janë edhe disa familjarë nga diaspora, ndërsa të lënduarit në Qendrën Klinike dhe Universitare të Kosovës i ka vizituar edhe ministri i Shëndetësisë, Arben Vitia.