Shpërbëhet Kuvendi i Maqedonisë

Kuvendi paraprakisht miratoi Buxhetin për vitin 2017, me çka u krijua kusht për shpërndarjen e kësaj përbërje të deputetëve, për të shkuar në zgjedhje të reje më 11 dhjetor

Me 110 vota për, asnjë kundër dhe asnjë abstenim, deputetët maqedonas votuan për shpërbërjen e Parlamentit të Maqedonisë. Pas votimit, ka vijuar një duartrokitje e fortë nga deputetët, ndërsa kryetari i Parlamentit, Trajko Veljanoski u ka uruar ish-deputetëve sukses të mëtutjeshëm në jetë.

Kuvendi paraprakisht sot e miratoi Buxhetin për vitin 2017, me çka u krijua kusht për shpërndarjen e kësaj përbërje të deputetëve, për të shkuar në zgjedhje të reje më 11 dhjetor.

Para fillimit të debatit për shpërndarje, deputetët i zgjodhën Dejan Boshkovski dhe Enever Elmazin për anëtar të Komisionit rregullator për energjetikë të Republikës së Maqedonisë. Po ashtu Kuvendi i solli edhe ndryshimet dhe plotësimet e Ligjit për bankat, të Ligjit për veprim inovativ dhe programit për shënimin e përvjetorëve jubilare për ngjarje dhe personalitete të rëndësishme.

Gjatë votimit për shpërbërjen e kuvendit të Republikës së Maqedonisë kryeparlamentari Trajko Veljanovski tha se shpërbërja e Kuvendit bëhet në bazë të nenit 63 paragrafi 6 të kushtetutës së Republikës së Maqedonisë, transmeton Koha.

“Përpara se të deklaroj rezultatin e votimit i cili tanimë është i dukshëm, dua që edhe një herë t’u falënderoj për bashkëpunimin që kemi pasur, bashkëpunim ky që ishte në interest ë Republikës së Maqedonisë , personalisht falënderoj çdonjërin deputet që ka dhënë kontributin e tij për të mirën e Republikës së Maqedonisë, çdonjërit nga ju në planin personal dhe profesional ju dëshiroj suksese në periudhën e ardhshme”, tha ai.