Shpendi i dërgon 70 lëndë në Prokurori

Rreth 70 lëndë të ndryshme që lidhen me prokurimin, ndërtimet pa leje edhe çështje të pronave, janë dërguar në Prokurorinë e Shtetit nga Komuna e Prishtinës

Komuna e Prishtinës i ka proceduar në Prokurorinë e Shtetit, rreth 70 lëndë të ndryshe që kanë të bëjnë me shkeljet ligjore të qeverisjes së kaluar, por shumica prej tyre po zvarritën nga gjyqësori. Kështu ka deklaruar kryetari i Komunës së Prishtinës, Shpend Ahmeti, i cili ka kërkuar që disa lëndë që lidhen me profilin të lartë të procedohen më shpejt.

“Janë mbi 70 lëndë të cilat i kemi dërguar…Nuk mendoj se është detyrë e imja që të gjej gjëra për ish-kryetarin apo për tjetër kënd. Zyra ime është që kur gjejë parregullsi, është ta mbroj interesin publik dhe ta mbroj interesin e Komunës së Prishtinës. Në qoftë se mendoj se diku është dëmtuar Komuna e Prishtinës, atëherë mendoj se kjo është rast për prokurorinë”, ka deklaruar Ahmeti për Kpress.

Sipas tij, në mesin e atyre lëndëve ka edhe të prokurimit edhe të ndërtimeve pa leje edhe çështje të pronave të ndryshme.

Ahmeti tha se kanë identifikuar shumë prona të cilat shfrytëzohen nga njerëz të ndryshëm dhe se për këto prona Komuna e Prishtinës nuk merr qira, madje disa prej tyre që shfrytëzohen nuk kanë as kontratë.

E i pyetur se këta uzurpues të pronave a janë njerëz të niveleve të larta, ai ka thënë se së pari duhet të kuptojnë se kush i ka uzurpuar këto prona, por se sipas tij në çështjet e ndërtimeve nuk kanë gjetur emra të profileve të larta.

I pari i Prishtinës, gjithashtu foli edhe për parregullsitë që i ka gjetur në këtë komunë, duke thënë se një ndër problemet kryesore janë pronat dhe tjetërsimi i këtyre pronave, madje këto raste kur dërgohen në prokurori kanë pak vonesa dhe se kjo po e brengos por jo që ka dyshime në këtë të fundit.

“Duhet vendimi menjëherë që ka parregullsi të procedojë te prokuroria, ata vendosin se a duhet të vazhdojë. Kemi pa, unë jam pak i brengosur me shpejtësinë me të cilën merret prokuroria me çështje”, ka deklaruar Ahmeti, sipas të cilit, nëse prokuroria vepron më shpejt, edhe besueshmëria do të jetë më e madhe ndaj drejtësisë.