Infermierët, kundër qeverisë: kërkojnë të pranohen të plagosurit nga Ukraina

Vendimi i qeverisë për mos pranim të të plagosurve nga Ukraina nuk mund të pajtohet me traditën humanitare të Zvicrës, shkruan SBK

Shoqata Profesionale e Infermierë/e-ve dhe Specialistëve të Infermierisë (SBK) kërkon pranimin në Zvicër të të plagosurve nga Ukraina, transmeton albinfo.ch. Qëndrimi negativ i Qeverisë Federale, i publikuar dy ditë më parë, është i pakuptueshëm, sipas kësaj shoqate.

Vendimi i përmendur i qeverisë për mospranim të të plagosurve nga Ukraina nuk mund të pajtohet me traditën humanitare të Zvicrës, shkruan SBK në një komunikatë, raporton srf.ch.

Sistemi ukrainas i kujdesit shëndetësor është në prag të kolapsit – edhe për shkak të shkeljeve të ligjit ndërkombëtar, siç është veprimi me shkatërrimin e spitaleve.

Sipas komunikatës, ushtarët dhe civilët e plagosur, por edhe personat e sëmurë rëndë, ose nuk mund të trajtohen fare ose jo në mënyrë adekuate në Ukrainë. Prandaj, shoqata kërkon nga Këshilli Federal që t’i kthehet edhe një herë vendimit, gjegjësisht ta ndryshojë atë.

---