Shopingu jashtë vendit i kushton Zvicrës me miliarda: Parlamenti merr masa

Për shkak të fuqisë së frangut, miliarda franga të konsumit shkojnë në vendet fqinje, ka argumentuar Komisioni për Financa i Dhomës Nacionale

“Turizmi tregtar”, gjegjësisht trendi në rritje i furnizimit të zviceranëve në tregjet e shteteve fqinje, është bërë shqetësim serioz për Dhomën Nacionale të Parlamentit të Zvicrës. Kështu ndodh pasi që Zvicra humb në këtë mënyrë një pjesë të mirë të tatimeve, gjegjësisht të Tatimit të Vlerës së Shtuar (TVSH).

Nisur nga kjo, Këshilli Federal është duke shqyrtuar nëse ky problem mund të luftohet përmes një regjimi të ri të Tatimit mbi Vlerën e Shtuar.

Për shkak të fuqisë së frangut, miliarda franga të konsumit shkojnë në vendet fqinje, ka argumentuar Komisioni për Financa i Dhomës Nacionale. Atje madje janë ngritur edhe struktura të reja të tregtisë me pakicë dhe është realizuar më shumë qarkullim ndërkohë që në Zvicër po zhduken vende pune në tregti dhe hapësira shitjeje.

Dhoma Nacionale e ka miratuar me 119 vota pro dhe 58 kundër, postulatin përkatës të Komisionit, përmes të cilit kërkohet që qeveria ta bëjë një raport lidhur me këtë çështje. Kështu, Këshilli Federal duhet që nga njëra anë të shqyrtojë nëse për zbutjen e situatës janë të nevojshme masa ligjore. Nga ana tjetër duhet të dëshmohet nëse mund të futet në fuqi një regjim i ri i Tatimit mbi Vlerën e Shtuar përmes të cilit të gjithë jonsumatorët do të paguanin TVSH, në njërin nga vendet fqinje ose në Zvicër.