Shkencëtarët dyshojnë që varianti afrikan i Covid-19 u reziston vaksinave

Keystone EPA/DIEGO AZUBEL

Shkencëtarët në Afrikën e Jugut thonë se ka “shqetësim të arsyeshëm” se varianti i ri i COVID-19 që po shpërndahet në këtë shtet mund të jetë më rezistues ndaj vaksinave aktuale që po qarkullojnë dhe kanë paralajmëruar se nevoja për shpërndarje të shpejtë të vaksinave është tejet kritike.

“Është shqetësim teorik. Një shqetësim i arsyeshëm… se varianti i Afrikës mund të jetë më rezistues”, ka thënë profesori Shabir Madhi, që po udhëheq testimet e vaksinës së “Oxford-AstraZenecas” në Afrikën e Jugut.

Ai ka shtuar se një përgjigje finale për këtë çështje duhet të dalë për pak javë, teksa testimi po vazhdon të zgjerohet.

Shqetësimi është rritur nga fakti se virusi tashmë ka disa mutacione dhe një nga to mund t’i shmangë sulmet e antitrupave që në kushte normale luftojnë koronavirusin, ka thënë ai për BBC-në, përcjell Albinfo.ch.

Vaksinat mësojnë trupin të nxisin përgjigje imunitare, duke krijuar antitrupa për të luftuar koronavirusin.

Madhi ka thënë se “ka pak gjasa” që mutacioni në Afrikën e Jugut të bëjë vaksinat e pavlefshme, por “mund t’ua dobësojë ndikimin”.

Megjithatë, prodhuesit e vaksinave dhe shkencëtarë të shumtë kanë thënë se vaksinat e lëshuara deri tash mund të modifikohen lehtë për t’iu përgjigjur varianteve të reja.

Deri tash në botë janë regjistruar më shumë se 85 milionë raste me COVID-19, ndërsa kanë vdekur më shumë se 1.8 milionë persona.