Shkelzen Gashi ia dhuron fitoren Shqipërisë

Goli i sulmuesit nga Zvicra, Shkëlzen Gashi, ishte vendimtar në fitoren e kombëtares shqiptare

Keystone

Shqipëria ka arritur të kthejë gjithçka në përballjen me Armeninë, nga 0:1 në 2:1.
Fillimisht në avantazh kaluan armenët nga një autogol i Mavrajt që në minutën e katërt të takimit.
Me fillimin e pjesës së dytë, Armenia ka mbetur me 10 lojtarë, pas ndëshkimit me karton të kuq të një prej lojtarëve armenë.

Pas kësaj, Shqipëria ka sulmuar vazhdimisht dhe ka goditur portën e armenëve.
Ka qenë Mavraj që ka shënuar golin e parë për Shqipërinë, ndërsa Shkëlzen Gashi vulosi fitoren 2:1 për Kombëtaren.

Ashtu siç sot raportoi “albinfo.ch”, lojtarët shqiptarë që luajnë në kampionatin zviceran, padyshim që patën rolin kryesor në këtë ndeshje. Edhe pse u inkuadrua bashkë me Ermir Lenjanin në pjesën e dytë të takimit, goli i sulmuesit më të mirë në ligat zvicerane, Shkëlzen Gashit ishte vendimtar për fitoren e kombëtares shqiptare.

Pos Gashit dhe Lenjanit, lojtarët tjerë që kanë dalë nga shkollat e futbollit zviceran, dhe që dhanë gjithçka në fitoren e Shqipërisë ishin edhe: Taulant Xhaka, Armir Abrashi dhe Burim Kukeli.

Me këtë fitore, Shqipëria shkon në kuotën e 7 pikëve aq sa ka edhe Danimarka dhe rriten shanset për një kualifikim të mundshëm në Euro 2016

Albinfo.ch