Shiten më se 40 për qind e biletave për koncertin e Dua Lipës

Organizatori i koncertit të Dua Lipës në Kosovë, Dukagjin Lipa dhe Komuna e Prishtinës, përmes një njoftimi kanë bërë të ditur se vetëm në ditët e para janë shitur afro 40 për qind e biletave për koncertin e javës që vjen në parkun “Gërmia” të Prishtinës.

Sipas tyre, kjo shitje biletash  i ka  kapërcyer të gjitha parashikimet. Sipas këtij njoftimi, organizatori nuk do të lejojë asnjë shikues më  të i ri se 16-vjeç, përveçse nëse shkojnë nën përcjelljen e një personi në moshë madhore.

“Të gjithë ata që duan të jenë pjesë e koncertit dhe janë nën moshën 16 vjeç, obligohen të kenë përcjellje të prindërve ose një personi në moshë madhore”, thuhet në njoftim.

Pjesëmarrësve nuk do t’u lejohet që me vete të kenë pije dhe ushqim, apo çfarëdo objekti i cili do të mund të përbënte rrezik për sigurinë e pjesëmarrësve, ndërsa me kërkesë të Policisë së Kosovës veturat nuk do të kenë qasje atë ditë në parkun “Gërmia”, thuhet në njoftim.

Organizatorët, po ashtu, njoftuan se siguria do të jetë në nivelin më të lartë, duke falënderuar edhe Policinë e Kosovës për ndihmën e dhënë në ruajtjen e sigurisë në hapësirat e parkut të “Gërmisë”.

“Në hyrje të koncertit të gjithë pjesëmarrësit do të kalojnë përmes tri kontrolleve të sigurimit, për të vazhduar më tutje në pjesën ku do të mbahet koncerti”, thuhet në njoftim.

Këngëtarja e njohur, Dua Lipa, për herë të parë mban koncert në Kosovë. Koncerti i saj do të jetë humanitar, ku te gjitha të hyrat nga shitja e biletave, si dhe nga përkrahësit dhe donatorët, do të mblidhen për “Sunny Hill Foundation”, një fon i themeluar nga vet Dua Lipa, i cili do ta ndihmojë shoqërinë kosovare në realizmin e projekteve të ndryshme zhvillimore.