Shefi i Ushtrisë së Zvicrës viziton sot Kosovën

Menjëherë më pas ai do të bëjë një vizitë edhe në Serbi, ku do të marrë pjesë në kremtimin e festës nacionale të Zvicrës

Njeriu numër një i Forcave të Armatosura Zvicerane, korpskomandanti André Blattmann viziton sot trupat zvicerane te stacionuara në Kosovë, gjegjësisht kontingjentet e Swisscoy-t. Menjëherë më pas ai do të bëjë një vizitë edhe në Serbi, ku, më 31 korrik do të marrë pjesë në kremtimin e festës nacionale të Zvicrës, 1 Gushtit.

Në Kosovë, krahas vizitës së trupave zvicerane në vendstacionimet e ndryshme të kontingjentit të 32-të të Swisscoy-t, ai do të takojë edhe zëvendëskomandantin e KFOR-it, gjeneralin austriak të brigadës, Anton Waldner me tëm cilin do të shkëmbejë mendime dhe përvoja, thuhet në një komunikatë të Ministrisë së Mbrojtjes të Zvicrës, transmeton albinfo.ch.

Ndërkaq më 31 korrik Bllattmann do të marrë pjesë në kremtimin e 1 Gushtit, me ç`rast orkestra e vogël ushtarake do të japë një koncert në kuadrin e turneut të saj në Evropën Juglindore. Para kësaj, komandanti Blattmann do të shfrytëzojë nga rasti për të zhvilluar një bashkëbisedim lidhur me situatën politike e të sigurisë në rajon, me shefin e shtatmadhorisë serbe, gjeneralin Ljubis Dikovic.