SHBA dhe Britania e Madhe kërkojnë formimin e Qeverisë së Kosovës

Pas deklaratës së Zyrës së Bashkimit Evropian reaguan edhe ambasadat për formimin e Qeverisë

Ambasada amerikane në Kosovë dhe e ajo britanike, në një njoftim zyrtar, kanë kërkuar formimin e Qeverisë së Kosovës.

Thuhet se menjëherë pas deklaratës së Zyrës së Bashkimit Evropian dhe shefave të misioneve të BE-së në Kosovë, ku kërkohet formimi i qeverisë së re dhe të vijohet me reforma dhe me dialogun, ka reaguar edhe Ambasada amerikane.

Duket se ata janë pajtuar me deklaratën e shefave të BE-së, duke thënë se qytetarët mezi po presin të krijohet qeveria e re dhe të sillen ndryshimet e premtuara.

“Ne pajtohemi me BE-në: njerëzit e Kosovës janë të padurueshëm për një Qeveri që do të sjellë ndryshime pozitive”, thuhet në postimin e ambasadës.

Nga ana tjetër, edhe Ambasada e Britanisë së Madhe ka reaguar me një njoftim të ngjashëm.

“Ne mbështesim deklaratën e Shefit të Zyrës së BE / Përfaqësuesit Special të BE-së, EULEX-it dhe shefave të misioneve të BE-së në Kosovë”, thuhet në reagimin e tyre, përcjell albinfo.ch.

---