Shaqiri vulos fitoren për Zvicrën

Zvicra ka fituar takimin e radhes kundër Lituanisë në ndeshjet kualifikuese "Euro 2016".

Ekipi helvetik ka mundur Lituaninë në vendin e tyre me rezultat 1-2. Edhe në këtë ndeshje lojtarët shqiptarë që luajnë për përfaqësuesen zvicerane ishin shtyllat kryesore të skuadrës, ndërsa Xherdan Shaqiri ishte edhe vendimtar me golin e fitores, raporton albinfo.ch.

Gjysma e parë e ndeshjes përfundoi pa gola, por me disa raste për të shënuar nga të dyja palët. Ndërkohë në pjesën e dytë gjërat ndryshuan. Pas një gabimi të mbrojtjës zvicerane, nikoqirët ishin të parët që kaluan në epersi në minutën e 65-të me golin e shënuar nga Fiodor Cernych.

Pas golit të pranuar, Zvicra bëhet më agresive me sulme të pa ndërprera dhe pas një aksioni të nisur nga Xherdan Shaqiri, në minutën e 69-të barazon rezultatin sulmuesi Josip Dërmiç. Zvicra edhe në vazhdim rrezikoi portën lituaneze disa herë me goditje nga Blerim Xhemaili e Xherdan Shaqiri, ndërkohë futbollisti me origjinë nga Zhegra, në minutën e 84-të shënoi golin e dytë dhe të fitorës për kombëtaren zvicerane.

Përfaqësuesja zvicerane e cila bën pjesë në grupin E ka pasur një nisje të dobët në kualifikimet Euro 2016, por në ndeshjet e fundit kanë bërë kthesën e suksesit!