Shaqiri: Ishte gol i jashtëzakonshëm

“Ishte një gol i jashtëzakonshëm, por nuk vlejti shumë. Goli im e shtyri ekipin më tepër, ishte një gol i rëndësishëm për mua. Ishte i bukur dhe gjithmonë jam krenar të shënoj për vendin tim”, u shpreh Shaqiri

KEYSTONE

Futbollisti shqiptar, Xherdan Shaqiri ka realizuar golin më të mirë deri më tani në Kampionatin Evropian, shkruan albinfo.ch.

Ai realizoi një super gol ndaj Polonisë, megjithatë, polakët u kualifikuan tutje, pasi ishin më të mirë në penallti. “Ishte një gol i jashtëzakonshëm, por nuk vlejti shumë. Goli im e shtyri ekipin më tepër, ishte një gol i rëndësishëm për mua. Ishte i bukur dhe gjithmonë jam krenar të shënoj për vendin tim, por ne jemi eliminuar dhe për këtë jam i zhgënjyer”, ka deklaruar Shaqiri.

Xherdan Shaqiri i ka kritikuar lojtarët e Polonisë, pasi këta të fundit vrapuan duke festuar nga këndi i tifozëve zviceran. “Nuk e di çfarë të them. Ata janë futbollistë profesionistë. Ata e dinë që duhet të shkojnë te pjesa tjetër e stadiumit për të festuar. Çfarë mund të them?”, u shpreh reprezentuesi zviceran.

Xherdan Shaqiri ka bërë me dije se do të vazhdojë të luajë për Zvicrën. Shaqiri duket se nuk do të largohet nga Përfaqësuesja e Zvicrës. “I tillë është futbolli”, deklaroi Shaqiri për “SRF”. “Ne do të përgatitemi për garat e ardhshme”, u shpreh ai.