Shaqiri, i lumtur për rikthimin në Bazel, thotë se është lider

Xherdan Shaqiri me Bazelin ka nënshkruar kontratë trevjeçare

Xherdan Shaqiri ka filluar stërvitjet me Bazelin, ku u shfaq shumë i lumtur për rikthimin në klubin amë. “Unë jam gjithmonë shumë pozitiv dhe do të mbetem gjithmonë i tillë. Baseli gjithmonë kërkon suksesin, ashtu si unë. Është klubi më i madh në Zvicër”, deklaroi Shaqiri, i cili u pensionua nga Përfaqësuesja e Zvicrës. “Qëllimi është që klubi të kthehet aty ku ishte”, theksoi Shaqiri.

“Si lojtar, kam qenë gjithmonë kapiten, pavarësisht nëse e kam pasur apo jo shiritin. Unë do ta shikoj të ardhmen. Trajneri vendos nëse do të bëhem kapiten, por është herët për të folur për këtë”, ka theksuar Shaqiri.

Shaqiri ka ritheksuar se Baseli ishte shtëpia e tij e vetme në Zvicër, transmeton albinfo.ch.

Ai po ashtu ka treguar se tashmë ka vendosur të jetojë në shtëpinë e prindërve të tij në Kaiseraugst.

Xherdan Shaqiri me Baselin ka nënshkruar kontratë trevjeçare. Ai pritet të paraqitet për herë të parë në ndeshjen kundër Yverdonit.

---