Sërish protestohet kundër KEK-ut

Mungesa e dhënies së përgjegjësisë nga KEK-u dhe Qeveria për keqtrajtim të konsumatorëve, ka shtyrë qytetarët të protestojnë sërish gjatë javë së ardhshme

Dorëheqja e qeverisë bullgare për shkak të protestave të qytetarëve për faturat e energjisë, duket se ka trimëruar edhe me shumë qytetarët kosovarë për të protestuar kundër faturave të shtrenjta të Korporatës Energjetike të Kosovës (KEK).

Kështu një grup i qytetarëve të pakënaqur, të cilët mendojnë se KEK-u ua ka fryrë faturat e energjisë, kanë paralajmëruar vazhdimin e protestave për të hënën, më 25 shkurt në qendër të Prishtinës.

Në njoftim dërguar medieve, organizatorët e protestës ndihen të  irrituar nga mosreagimi institucional ndaj “hajnive të dukshme të Korporatës Energjetike të Kosovës në faturimin e energjisë elektrike për muajin janar”.

“Me mungesën e dhënies së përgjegjësisë nga zyrtare Korporatës dhe Qeverisë së Kosovës për keqtrajtim të konsumatorëve, me mos ndëshkimin e asnjë zyrtari përgjegjës për këtë tentim hajnie të kapur në flagrance, me shpërfilljen institucionale për rishikimin e politikave tarifore të energjisë elektrike…bëhet thirrje për një protestë kundër hajnisë”, thuhet në reagimin e grupit protestues.

Kërkesat e protestuesve, siç thuhet janë: hetimi, konstatimi dhe përmirësimi i të gjitha faturave të muajit janar, të lëshuara nga Korporata Energjetike e Kosovës, dorëheqja e gjithë zinxhirit
menaxherial që me pjesëmarrje aktive ose me neglizhencë, i ka kontribuar kësaj tentative për hajni, si dhe fillimin e hetimeve për këtë kaos.

Ndryshe pakënaqësitë qytetare u rritën në fillim të këtij muaji, pasi  që faturat e KEK-ut ishin dukshëm më të larta se ato të dhjetorit.  Arsyetimi i KEK-ut ishte se rryma është shtrenjtuar për 20 për qind,  ndërsa data e leximit e tejkalon kohën prej 30 ditësh, duke shkuar në 34 ose 36 ditë.

Mirëpo menjëherë kjo u demantua nga Ministra e Zhvillimit Ekonomik, duke thënë se nuk ka shtrenjtim të energjisë, ndërsa KEK-iu iu rekomandua që t’i rishikojë faturat. Por, ky i fundit evidentoi vetëm 200 gabime në gjithë Kosovën, duke irrituar edhe më shumë qytetarët.

Ndryshe shtrenjtimi i energjisë elektrike përfundoi me “fatalitet” për qeverinë e Bullgarisë. Ishin protestat e qytetarëve që detyruan qeverinë të dorëhiqet.

Faturat e janarit në Kosovë kanë shkuar nga 50 deri në 250 euro për  energji. Kjo shumë tejkalon edhe pagën normale të një punëtori.  Prandaj edhe pankartat e disa protestueseve gjatë fillimit të këtij muaji kanë qenë: “japin kredi për t’i paguar faturat e energjisë elektrike”.