Serbia nuk lëshon pe: s’ka marrëveshje për telekomin

Bisedimet 20 orëshe të ndërmjetësuara nga BE, nuk kanë sjellë marrëveshje konkrete që Kosova ta marrë kodin telefonik 383. Serbia nuk lëshon pe në këtë çështje  

Një takim maratonik që ka zgjatur rreth 20 orë, ka përfunduar në Bruksel pa marrëveshje konkrete ndërmjet delegacionit të Beogradit dhe Prishtinës për kodin telefonik. Në agjendë, temë kryesore ishte përfundimi i hapave drejt marrjes së kodit telefonik shtetëror për Kosovën, 383 nga ana e ITU-së (Organizata Ndërkombëtare e Telekomunikacionit).

I njëjti takim nga pala serbe ishte paralajmëruar se do të ketë në agjendë edhe çështjen e themelimit të Asociacionit të komunave me shumicë serbe në Kosovë. Por, në reagimin e delegacionit të Kosovës thuhet se “ky takim ka qenë vetëm për çështjet e kodit telefonik dhe se përfaqësuesi i Serbisë, Marko Gjuriq, ka gënjyer kur ka thënë se në Bruksel do të bisedohet për asociacionin”.

“Përkundër angazhimeve të delegacionit të Qeverisë së Kosovës dhe Bashkimit Evropian që çështja e telekomit të përmbyllet në këtë raund bisedime, kjo nuk është arritur”, thuhet në njoftimin zyrtar që ka lëshuar Zyra e ministres për Dialog të Kosovës, Edita Tahiri, raporton REL.

Delegacioni i Kosovës, sipas komunikatës së ministres Tahiri, ka mbrojtur qëndrimin që marrëveshja për telekomin duhet të bazohet në ligjet dhe kornizën rregulltore të telekomunikacionit të Kosovës. Prandaj, ka kërkuar që edhe zgjidhjet teknike zbatuese duhet të jenë plotësisht me ligjet e Republikës së Kosovës.

Kurse delegacioni i Serbisë, sipas ministres Tahiri, ishte munduar që në disa çështje procesi i zbatimi të dalë jashtë ligjeve të Kosovës.

Në këtë takim, sipas komunikatës së Ministrisë së Dialogut, pala serbe ishte jo serioze dhe kohë-pas-kohe konfuze dhe e pa pakoordinuar.

Mungesën e rezultateve konkrete e ka konfirmuar edhe shefi i Zyrës për Kosovën në qeverinë e Serbisë, Marko Gjuriq. Ai ka thënë se marrëveshja për çështjen e telekomunikacionit nuk është arritur, pavarësisht se dallimet mes palëve janë të vogla.

Gjuriq u ka thënë medieve serbe se ka insistuar deri në fund që t’i mbrojë interesat e Serbisë, duke u bazuar në marrëveshjen politike të arritur në nivel të kryeministrave më 25 gusht vitin e kaluar.

Në përpjekje për të përmbyllur hapat zbatuese për kodin, në orët e mbrëmjes në procesin e ndërmjetësimit është inkuadruar edhe Angelina Eichhorst, drejtoresh për Evropën Perëndimore dhe Ballkanin Perëndimor në Shërbimin për Politikë të Jashtme dhe Siguri të Federica Mogherinit, megjithatë takimi në orët e mëngjesit përfundoi pa i përmbyllur disa nga çështjet.

Mungesa e kodit telefonik, sipas të dhënave të Qeverisë, i ka shkaktuar deri më tani Kosovës humbje prej 200 milionë euro.