Sekreti i qindvjeçares: As sport, as hapa

Të enjten, më 27 shtator, Juliana Koo do të festojë 107-vjetorin e saj. Amerikania ka lindur në shekullin e fundit, në vitin 1905, në Tianjin të Kinës, në kohën kur Cari i Rusisë përballohej me luftën kundër japonezëve dhe kur Theodore Roosevelt ishte president i Shteteve të Bashkuara.

Të dielën e kaluar fëmijët e saj, nipërit dhe stërnipat si dhe miqtë u mblodhën të gjithë në Hotel Pierre në Nju-Jork për të festuar këtë ngjarje, një traditë që mbahet që nga nëntëdhjetëvjetori i saj në vitin 1995, raporton gazetari James Barron në blogun e tij në “New York Times”.

Në vitin 2005, me rastin e njëqindvjetorit të saj, Juliana Koo pati mbajtur edhe një fjalim:

“Zakonisht, unë kurrë nuk kam dhënë fjalim, por për ditëlindjen time të njëqindtë kam vendosur që të paktën të përpiqem të mbaj një fjalim”.

Në blogun e tij, James Barron është interesuar për këtë jetëgjatësi të jashtëzakonshme, duke i pyetur të afërmit e zonjës. Mbesa e madhe e saj, Ying YingYuyan, thotë që shpjegimi është shumë i thjeshtë:

“Kur dikush e ka pyetur atë për sekretin e jetës së saj të gjatë, ajo është përgjigjur: “Mos bëni ushtrime, hani gjalpë sa të doni, por kurrë mos u ktheni prapa për të vështruar të kaluarën”.

Këto tri këshilla nuk janë të vetmet për të shpjeguar jetëgjatësinë e Juliana Koo-së. Vajza Shirley Young beson se pasioni i saj për mishin e derrit si dhe urrejtja e saj për receptet mjekësore kanë shumë të bëjnë me këtë.

“Ajo nuk pi ilaçe. Kur mjekët i japin asaj hapa për të pirë, ajo zakonisht i fsheh, ose vetëm e pi përgjysmë. Njerëzit vazhdojnë ta këshillojnë të marrë barna kineze, por ajo nuk i pi asnjëherë”.

Sidoqoftë, kjo metodë duket se ka treguar për rezultatet e veta dhe duket mjaft e bindshme për njëqindvjeçaren. Bile, thuhet se në ditëlindjen e saj, ndërsa kërcente me djalin e saj në këngën e njohur Moon River, ajo është ankuar se muzika ishte tepër e ngadalshme.