Seanca konstituive e Kuvendit të Kosovës vazhdon më 24 gusht

Pas konsultave që partitë politike zhvilluan me kryesuesin e seancës, deputetin Adem Mikullovci,u vendos që vazhdimi e seancës konstituive të vazhdojë më 24 gusht

Partitë politike në Kosovë ranë dakord që vazhdimi i seancës konstituive të Kuvendin e Kosovës të vazhdoj më 24 gusht. Ky vendim erdhi pas një konsulte që partitë politike zhvilluan me kryesuesin e seancës, deputetin Adem Mikullovci. Vazhdimin e seancës më 24 gusht e kërkuan përfaqësuesit e koalicionit fitues PAN (PDK-AAK-Nisma).

Në emër të këtij koalicioni, Enver Hoxhaj ka thënë se pas konsultimit me partnerët e koalicionit është vendosur që seanca të vazhdojë më 24 gusht, ndërsa koalicioni i krahut të luftës që firoi zgjedhjet, do të propozojë për kryetar të Kuvendit, Kadri Veselin.

Kurse, Avdullah Hoti nga koalicioni ndërmjet Lidhjes Demokratike të Kosovës, Aleancës Kosova e Re dhe Alternativës, ka thënë sërish se të gjitha partitë politike duhet të jenë të përgjegjshme para qytetarëve dhe nuk duhet të lejohet në këtë formë, siç po ndodh bllokimi i institucioneve.

Në takimin konsultativ morën pjesë përfaqësuesit e Lidhjes Demokratike të Kosovës, Aleancës Kosova e Re dhe Alternativës si dhe përfaqësuesit e minoriteteve. Në këtë takim nuk ishin të pranishëm përfaqësuesit e Lëvizjes Vetëvendosje.

Ndryshe, pesë herë radhazi Kuvendi i Kosovës ka dështuar ta zgjedh kryetarin dhe nënkryetarët e Kuvendit, në mungesë të deputetëve të koalicionit PAN. Është ky koalicion që sipas Kushtetues, e ka të drejtën absolute për propozimin dhe zgjedhjen e kryeparlamentarit. Por, duket se koalicioni fitues nuk i ka numrat e mjaftueshëm për votim dhe si i tillë po e zvarritë votimin.