SC Drita Kosova merr çmimet kryesore nga Federata e Futbollit Shqiptar në Gjermani

Epiteti i klubit më të mirë i takoi pra SC Drita Kosova Kornwestheim, futbollisti më i mirë i viti u shpall Fatlum Bajrami nga SC Drita Kosova, trajneri më i mirë Safet Muzliukaj po ashtu nga SC Drita Kosova dhe punëtori sportiv i vitit 2017 u shpall Lulzim Maliqi nga FC Kosova München

Klubi shqiptar, SC Drita Kosova Kornwestheim, ka marrë çmimet kryesore nga Federata Futbollit Shqiptar të Gjermanisë.

Klubi më i mirë, futbollisti më i mirë dhe trajneri më i mirë, janë çmimet që edhe për vitin 2017 i takuan klubit SC Drita Kosova Kornwestheim, njofton Federata në rrjetet sociale, përcjell albinfo.ch.

Manifestimin me një telegram urimi e përshëndeti edhe Besnik Miftaraj, konsull i Republikës së Kosovës në Shtutgart.

Ky organizim është mbajtur në Frankfurt të Gjermanisë nga Federata e Futbollit Shqiptar në Gjermani (FFSHGJ) dhe klubit vendës FC Kosova Frankfurt, në fundjavën që lamë pas.

Me këtë rast u zhvillua ndeshja miqësore e futbollit në mes të seleksionit të FFSHGJ-së dhe një seleksioni të futbollistëve shqiptarë nga Holanda, që ishte bërë në saj të angazhimit të Shoqatës Shqiptare “Kosova” në Dordrecht.

Ndeshja që u zhvillua mes këtyre dy seleksioneve, përkundër kohës së ftohtë dhe me shi, u pëlqye mjaft nga shikuesit, si dhe nga strukturat e të dy ekipeve. Ndeshjen e referoi Rexhep Potoku me ndihmën e Albion Bitiqit dhe Arbër Bytyqit. Ndeshja u mbyll me fitoren e ngushtë të seleksionit të FFSHGJ 4:3. Golat i shënuan: Flakron Thaçi, Alvaro Zalla, Ardit Bytyqi dhe Getarb Salihu për FFSHGJ-në, kurse Endrit Voca 2 dhe Rinor Mustafa për seleksionin nga Holanda.

Pas ndeshjes u shtrua një darkë e përbashkët për të dy ekipet, si dhe mysafirët e ftuar. Mysafir special i këtij manifestimi ishte Skënder Selmani, ish-anëtar i kryesisë së Federatës së Futbollit të Kosovës në vitet e 90-ta, kryetar i Komisionit të Gjyqtarëve dhe kryetar i Këshillit Organizativ të FFK-së për zhvillimin e ndeshjeve miqësore në Tetovë dhe në Shqipëri, në hapat e parë të formimit të FFK-së, si dhe ish-donator i një varg manifestimesh sportive në Kosovë dhe jashtë saj.

Ndërkaq manifestimi u mbyll me shpalljen e me të mirëve nga FFSHGJ-ja për vitin 2017. Komisioni për shpalljen e më të mirëve ishte Miftar Dragidella, Arben Berisha e Muhamet Vokrri. Edhe sivjet nuk e pati vështirë ngase të tri shpërblimet kryesore ia ndau klubit SC Drita Kosova Kornwestheim, si fituese e trefishtë radhazi e Kupës së Kosovës në Gjermani.

Kështu epiteti i klubit më të mirë i takoi pra SC Drita Kosova Kornwestheim, futbollisti më i mirë i viti u shpall Fatlum Bajrami nga SC Drita Kosova, trajneri më i mirë Safet Muzliukaj po ashtu nga SC Drita Kosova dhe punëtori sportiv i vitit 2017 u shpall Lulzim Maliqi nga FC Kosova München.

Ndër 10 futbollistët më të mirë të vitit 2017 u gjenden edhe:

2. Pjetrush Dushi, FC Kosova München
3. Drilon Gervalla, AKV Bardhosh Gërvalla Ludwigsburg
4. Frenklin Sefa, FC Kosova Frankfurt
5. Fabijan Perdedaj, FC Liria Berlin
6. Naim Pajaziti,FC Kastrioti Stukenbrock
7. Besar Gjocaj, FC Kosova München
8. Bujar Shala, SC Drita Kosova Kornwestheim
9. Arian Haxhiu, FC Iliria Rosenheim
10. Algos Havolli, DAKV Atdheu Augsburg

Me mirënjohje u nderuan edhe Skënder Selmani, Nexhmedin Bunjaku, Shoqata Shqiptare “Kosova” në Dordrecht të Holandës dhe kryetari i saj Enver Avdija, njofton tutje federata në rrjetet sociale.

Kupat e mirënjohjet i ndanë: Ruzhdi Statovci, kryetar, Enver Muzliukaj, nënkryetar, Miftar Dragidella, menaxher, Mroz Gegaj, Mustafë Bellaina e Arben Berisha, anëtarë të Kryesisë së FFSHGJ, Muhamet Vokrri, kryetrajner FFSHGJ-së dhe Rexhep Potoku, kryetar i Shoqatës së gjyqtarëve të futbollit të FFSHGJ-së.

 

---