“Salloni i librit në kështjellë”: 33 autorë, prej tyre 3 shqiptarë

Autorët shqiptarë që do të prezantojnë librat e tyre në panair janë: Shemsi Makolli, Besnik Camaj dhe Ilir Xheladini

Të shtunën, më 11 qershor, shtëpia botuese i-liredition organizon edicionin e parë të panairit të librit «Salon du livre au château» në oborrin e kështjellës në Cressier Neuchâtel. Të pranishëm do të jenë 33 autorë, ndër të cilët 3 janë nga Kosova. Këtë njoftim për albinfo.ch e jep Ilir Xheladini, themelues dhe pronar i shtëpisë së përmendur botuese.

Ai tregon tutje se autorët shqiptarë që do të prezantojnë librat e tyre në panair janë: Shemsi Makolli, Besnik Camaj dhe Ilir Xheladini.

Kështu, Shemsi Makolli do të prezantojë librin e tij të sapobotuar «Déesses profanées» që është një elegji për femrat e dhunuara në Kosovë, ndërsa Besnik Camaj vjen me librat e tij «Strehë dashnie» dhe «Rrugës jam».

Ilir Xheladini prezantohet me librin e ri për fëmijë «Le jugement de la mer» dhe romanin «Le carrefour des destins», ku trajtohen fatet e 4 personave, jetët e të cilëve marrin kahje të ndryshme pas takimit të tyre.

Me një program të ngjeshur, panairi zgjat nga ora 09 deri në 17, njofton albinfo.ch. Përpos takimit me autorë dhe dedikim të librave, në program ka edhe konferencë me autorë, lexim teksti të pabotuar, aktivitete për fëmijë – tregime, vizatime e ngjyrosje me ilustrues, prezantim të librave të sapobotuar si dhe ekspozitë e përgatitur nga arkeologu Fabian Langenegger.

Për vizitorët më kuriozë mund të gjenden edhe libra në gjuhën shqipe nga autorët tanë.

---