Sa ishte inflacioni në Zvicër gjatë dhjetorit 2022

Gjatë vitit 2022, çmimet e produkteve vendase janë rritur mesatarisht me 1.6%

Gjatë muajit dhjetor 2022 indeksi i çmimeve të konsumit të Zvicrës (CPI) ra me 0.2%, duke e çuar normën vjetore të inflacionit për vitin 2022 në +2.8%, sipas Zyrës Federale të Statistikave të Zvicrës (FSO).

Deflacioni modest gjatë dhjetorit 2022 u shkaktua nga disa faktorë, duke përfshirë rënien e çmimeve të karburanteve dhe naftës për ngrohje. Rënie kanë shënuar edhe çmimet e perimeve frutore, krahas çmimeve të barnave. Në të kundërtën, u rritën qiratë për banesat e pushimit dhe marrja me qira e transportit privat, shkruajnë mediat zvicerane, përcjell albinfo.ch.

Gjatë vitit çmimet e telefonisë fikse dhe celulare dhe të barnave u ulën, duke ulur ndikimin e rritjes së çmimeve të energjisë dhe shëndetësisë.

Gjatë vitit 2022, çmimet e produkteve vendase janë rritur mesatarisht me 1.6%, ndërsa çmimet e produkteve të importuara janë rritur me 6.7%.

Inflacioni mesatar vjetor ishte +0,6% në vitin 2021 dhe -0,7% në 2020. Gjatë tre vjetëve të fundit IÇK-ja e kombinuar e Zvicrës është rritur me 2,7%, ekuivalente me një normë vjetore prej 0,9%.

---