Sa imamë shqiptarë janë në Zvicër

Rreth 130 imamë janë aktivë në Zvicër, kryesisht sunitë, dhe shumë prej të cilëve marrin trajnimin e tyre fetar jashtë vendit, në Ballkan, Turqi, Egjipt dhe Arabinë Saudite

Hulumtimi nga Qendra Zvicerane për Islam dhe Shoqëri (SZIG) në Universitetin e Fribourg ka treguar se 130 imamë janë aktivë në xhami dhe vende të tjera të lutjes në Zvicër. Pothuajse të gjithë janë sunitë dhe gati gjysma janë me origjinë turke.

Komuniteti që flet shqip, kryesisht nga Kosova dhe Maqedonia Veriore, kanë 40 imamë, 30 prej të cilëve punojnë me kohë të plotë, shkruajnë mediat zvicerane, përcjell albinfo.ch.

Ekzistojnë gjithashtu 13 me origjinë boshnjake dhe 15-20 nga bota arabe. Aktualisht nuk ka një program standard trajnimi për imamët në Zvicër, dhe shumica e tyre marrin trajnimin e tyre fetar jashtë vendit.

Përveç konsideratave teologjike, zgjedhja e vendndodhjes së studimit bëhet për shkak të faktorëve ekonomikë, siç janë bursat, mundësinë për të mësuar arabisht dhe motivimin personal, zbuluan studiuesit, përcjell tutje albinfo.ch.

Shumica e trajnimeve zhvillohen në Ballkan, Turqi, Egjipt dhe Arabinë Saudite. Për shembull, shumë imamë – kryesisht me origjinë shqiptare – kanë marrë trajnime në Arabinë Saudite, e cila ofron bursa bujare për disa imamë të rinj, veçanërisht ata nga rajone me të ardhura të ulëta të ish-Jugosllavisë.

 

---