Rusia financoi disa parti evropiane, në mesin e tyre edhe një parti në Shqipëri

Burime amerikane bëjnë të ditur se bëhet fjalë për 300 milionë euro

Një lajm që mund të tronditë politikën e vendeve të Bashkimit Europian, por jo vetëm. Një funksionar i lartë i administratës amerikane ka treguar rezultatet e hetimit të National Intelligence, shërbimeve sekrete amerikane mbi financimet e Moskës ndaj partive të disa vendeve europiane. Rezultati është shqetësues dhe mund të jetë përfshirë edhe vetë Shqipëria.

Sipas burimeve, janë më shumë se 300 milionë dollarë që u janë paguar nga Kremlini partive të më shumë se 20 vendeve, që në këmbim duhet të përçonin në opinion publik përkatës një imazh pozitiv të Rusisë dhe regjimit të Vladimir Putin, duke ashpërsuar ndërkohë retorikën kundër BE-së.

Sipas burimeve të Zërit të Amerikës, Shqipëria është një nga vendet e përfshira. “Në Shqipëri, Rusia i dha rreth gjysmë milioni dollarë Partisë Demokratike më 2017 përmes kompanive fantazëm”, deklaron një burim i informuar mbi raportin, transmeton Albinfo.ch.

Pagesat sipas burimeve amerikane kanë filluar më 2014, pas pushtimit të Krimesë, duke përfshirë parti të ekstremit të majtë dhe të djathtë. Në mënyrë indirekte, lajmi është pohuar edhe nga sekretari i Shtetit, Antony Blinken, i cili u ka shpërndarë ambasadave të shumta amerikane në Europë një kabllogram të rezervuar, ku detajohen pyetjet që diplomatët amerikanë duhet t’u bëjnë qeverive të vendeve ku ndodhen mbi këtë çështje delikate.

Sipas burimeve, Departamenti i Shtetit ka informuar qeveritë e përfshira mbi detajet e financimeve. Lajmi ka marrë jehonë të madhe. Një nga reagimet më të mëdha vjen nga Italia, që ndodhet në pragun e zgjedhjeve parlamentare, ku sulmohet në veçanti Lega e Matteo Salvinit, që prej kohësh ka deklaruar afërsinë e tij me presidentin rus, Vladimir Putin.

---