Rusia akuzohet për presion ndaj laboratorit zviceran

Photo: AFP

Kreu i një laboratori zviceran, i njohur për punën e tij në luftën kundër luftës kimike, thotë se Rusia aplikoi presione të forta politike në një përpjekje për të diskredituar punën e tij vitin e kaluar.

“Nëpërmjet deklaratave të rreme dhe sulmeve spiunuese, Rusia ushtron presion të paparë ndaj një institucioni që është një partner kryesor i Organizatës për Ndalimin e Armëve Kimike (OPCW)”, tha Marc Cadisch, kreu i Laboratorit Spiez për CH Media në intervistat e botuara në gazeta të ndryshme zvicerane të enjten.

Drejtuar nga Zyra Federale për Mbrojtjen Civile, Laboratori Spiez është i ngarkuar me këshillimin e autoriteteve kombëtare dhe organizatave ndërkombëtare në zhvillimin e marrëveshjeve të kontrollit të armëve dhe të mospërhapjes, përcjell albinfo.ch

Cadisch akuzoi Rusinë për “instrumentalizimin politik” dhe tha se 2018 ishte një vit i çmendur – i pashembullt dhe unik për laboratorin, i cili u përfshi në hetimin e sulmit ndaj agjentit të dyfishtë rus Sergei Skripal.

Sipas Cadisch, pas sulmit helmues në Skripal në Britani, ministria e jashtme ruse kërkoi të vinte në pikëpyetje kredibilitetin e OPCW dhe të ushqente pasiguri me citime të supozuara nga një raport zyrtar mbi krijuesin e toksinës. Cadisch tha se ndërsa laboratori kishte testuar mostrat për përbërjen e tyre kimike, nuk do të bënte kurrë një deklaratë se kush mund të kishte zhvilluar ose përdorur helmin.