Rritje e papritur e rasteve të reja në Zvicër: 53% më shumë se javën e kaluar

BAG raporton 4 raste të reja të vdekjes në lidhje me koronavirusin. Ky është i vetmi parametër i zvogëluar, gjatë javës që shkoi

Zyra Federale e Shëndetit Publik (BAG) raportoi sot 10,289 raste të reja që kanë rezultuar pozitive me koronavirus gjatë javës së fundit. Kjo e vendos mesataren 7-ditore në 1473 që është 53 për qind më shumë se në javën e kaluar, duke shënuar kështu një trend të ri të rritjes së madhe të numrit të infeksioneve.

Në trendin aktual, mesatarja 7-ditore e infeksioneve të reja dyfishohet afërsisht çdo 11 ditë, transmeton albinfo.ch. Incidenca 14-ditore aktualisht është 177.75.

BAG raporton 107 shtrime të reja në spital, mesatarja 14-ditore e tyre është 12 në ditë, shkruan srf.ch. Aktualisht 320 persona po trajtohen në spital për Covid-19 dhe kjo është 3 për qind më shumë se në javën e kaluar.

Aktualisht janë 21 pacientë me Covid-19 në terapi intensive ose 5 për qind më shumë se javën e kaluar.

BAG raporton 4 raste të reja të vdekjes në lidhje me koronavirusin. Ky është i vetmi parametër i zvogëluar, gjatë javës që shkoi.

Deri më tani, në Zvicër janë kryer 15,798,852 vaksina (përfshirë vaksinat “përforcuese”). Sipas llogaritjeve aktuale, mesatarisht 1086 persona vaksinohen në ditë. Kjo është 0.2 për qind më shumë se në javën e kaluar.

Aktualisht, 69.2 për qind e popullsisë kanë marrë të paktën dy doza (“të vaksinuara plotësisht”). 43.4 për qind e popullsisë tashmë kanë marrë një dozë të tretë (“përforcues”).

---