Rritje e lehtë e numrit të rasteve sociale gjatë pandemisë në Zvicër

Sipas sondazhit të parë të shërbimeve sociale, një rritje e vogël prej 2.7% e numrit të rasteve është konstatuar në të gjithë vendin në mes të majit

Si pasojë e krizës së koronavirusit, Konferenca Zvicerane për Mirëqenie Sociale (Skos) pret një rritje të numrit të njerëzve të varur nga ndihma sociale në dy vitet e ardhshme.

Një vlerësim nga mesi i majit tregon tashmë një rritje të vogël të rasteve sociale në Zvicër, shkruan srf.ch.

Sipas sondazhit të parë të shërbimeve sociale, një rritje e vogël prej 2.7% e numrit të rasteve është konstatuar në të gjithë vendin në mes të majit, njofton Skos, transmeton albinfo.ch.

Në Zvicrën frankofone dhe në Zvicrën Qendrore, rritja ka qenë më e dukshme, 4.4 për qind gjegjësisht 4.2 për qind krahasuar me muajin mesatar të një viti më parë.

Skos supozon se përmasat e plota të ndikimit të krizës do të bëhen të dukshme vetëm disa muaj pas kësaj rritjeje të rasteve sociale.

Kjo, sipas Skos, për faktin se aktualisht ende janë duke funksionuar instrumentet e sigurimit të papunësisë dhe kompensimi i të ardhurave për shkak të dëmeve të shkaktuara nga korona, përcjell albinfo.ch. Veç kësaj, ndihma sociale mund të merret vetëm kur të jenë shterruar mjetet tjera në dispozicion të atij që aplikon për këto ndihma.

---