A ka Kosova resurse teknike për t’u përballur me zjarret?

Ilustrim @pixabay

Kosova nuk ka arritur t’u shpëtojë zjarreve, të cilat tash e disa ditë janë përhapur nëpër vende të ndryshme të botës si rezultat i temperaturave të larta.

Aktualisht në Kosovë janë katër vatra aktive. Në Suharekë, në rajonin e Prizrenit, në dy lokacione, Vranicë dhe Bukosh (Parku Nacional Bjeshkët e Nemuna), si dhe në Janjevë.

Por sa është e përgatitur Kosova për fatkeqësitë me zjarret dhe a ka mjaftueshëm mjete për t’i shuar ato?

Zëdhënësi i Agjencisë për Menaxhimin e Emergjencave, Nehat Koqinaj, për GI, ka thënë se mjetet për ballafaqimin e fatkeqësive me zjarre janë të domosdoshme.

“Mjete te mjaftueshme për ballafaqim me zjarre në periudha si kjo ose edhe të ngjashme nga e kaluara është pyetje, e cila shtrohet edhe globalisht. Andaj, qasja dhe veprimi i koordinuar nga zanafilla e kërcënimit në fatkeqësi është kruciale. Ndërveprimi i koordinuar nga i gjithë kapaciteti vendor është jetik për zvogëlimin e rritjes së kërcënimit, qoftë nga zjarret, po ashtu edhe nga fatkeqësi të tjera”, ka thënë si.

Koqinaj gjithashtu ka thënë se kapacitet e njësive profesionale për zjarrfikje po ballafaqohen me mungesa të trashëgueshme, pavarësisht përkushtimit të zjarrfikësve.

“Kapaciteti i njësive profesionale për zjarrfikje dhe shpëtim ballafaqohet me mungesa te trashëguara! Por, përkushtimi dhe reagimi në raste të fatkeqësive është jo rrallëherë për admirim”, ka thënë ai.

Fatkeqësisht, Kosova nuk ka asnjë helikopter në Institucionet e Sigurisë Publike.

Gjatë ditës së sotme kryeministri i Kosovës, Albin Kurti, ka thënë se janë duke bashkëpunuar me komunat, të cilat kanë mungesë të stafit në Brigadat e Zjarrfikësve për të lokalizuar zjarret, nga të cilat po rrezikohet Kosova.

“Po bëjnë gjithçka në bashkëpunim me komunat që nuk kanë mjaftueshëm zjarrfikës. Unë jam në kontakt me kryetarë të komunave dhe me mundësitë që kemi po bëjmë më të mirën. Po mobilizohemi dhe kemi kërkuar ndihmën e FSK dhe KFOR-it dhe mbajtja nën kontroll e këtyre zjarreve të egra paraqet sfidën për shtetin tonë dhe kemi rritur të mos kemi dëme të mëdha materiale dhe në njerëz”, ka thënë Kurti.