Rreth 25 mijë raste gripi në Kosovë

Instituti Kombëtar i Shëndetësisë Publike në Kosovë ka njoftuar se nga 1 tetori i vitit 2017 deri më 31 janar të vitit 2018 janë raportuar gati 25 mijë raste gripi në nivel vendi.

Sipas një njoftimi për media, IKSHPK ka treguar se saktësisht ishin regjistruar 24932 raste gripi, 3357 raste infeksione respiratore akute deh 62 raste të rënda respiratore akute.

Rastet janë raportuar nga të gjitha komunat, me numrin më të madh nga Prishtina, Prizreni dhe Podujeva.

Ky institucion ka rekomanduar që qytetarët të kenë kujdes të mos dalin në ambiente të ftohta, të mos qëndrojnë në lokale të mbyllura me dendësi të madhe të njerëzve dhe të përdorim sa më shumë lëngje të nxehta dhe vitamina.

“Kemi kërkuar nga Ministria e Arsimit të raportojë në baza ditore mungesat e nxënësve në të gjitha shkollat e Kosovës, që paraqet një indikator të rëndësishëm për të rekomanduar ndërprerjen eventuale të mësimit në shkolla. Aktualisht situata epidemiologjike është nën kontroll sa i përket gripit sezonal, por me gjendjen aktuale klimatologjike që po mbretëron në Kosovë, ku ekziston mundësia e rritjes së rasteve”, përfundon njoftimi.