Rona me këngën “Suus”në Rumani

Rona do të paraqitet edhe në koncertin tradicional ‘Eurovision in Concert’, i cili, më 21 prill, organizohet në Amsterdam të Holandës

Pas Podgoricës, përfaqësuesja e Shqipërisë në Eurosong, Rona Nishliu në kuadër të fazës së promovimit të këngës së saj ‘Suus’, ka udhëtuar drejt Bukureshtit (Rumani), me qëllim të pjesëmarrjes në emisionet televizive në kuadër të televizioneve Antena 1, TV Rumania si dhe TVR1.

Kjo javë nuk mbyllet vetëm me këtë vizitë, meqë Rona do të paraqitet edhe në koncertin tradicional ‘Eurovision in Concert’, i cili, më 21 prill, organizohet në Amsterdam të Holandës, raportojnë mediat në Prishtinë.

Triumfi në festivalin tradicional të këngës shqiptare i ka mundësuar këngës ‘Suus’ rrugëtimin drejt Baku-së, në Azerbajxhan, ku, në garën e madhe të këngës europiane, Rona do ta perfaqësojë Shqipërine. Në këtë festival prestigjioz Rona Nishliu do të paraqitet në gjysmëfinalen e parë, më 22 maj, ndërkaq, sipas shortit, ajo këndon e pesta me radhë.