Rohde: Me Kosovën kemi marrëdhënie të fuqishme diplomatike

Ambasadori i Gjermanisë në Kosovë ka shënuar 15 vjetorin e marrëdhënieve diplomatike mes Kosovë dhe Gjermanisë.

Sipas tij, marrëdhëniet diplomatike gjermano-kosovare janë të fuqishme.

“Nuk më bie në mend ndonjë shtet tjetër me të cilin kemi marrëdhënie kaq të fuqishme diplomatike. Nuk është vetëm diaspora me rreth 500 mijë qytetarë me prejardhje kosovare në Gjermani, por edhe pjesëmarrja në këtë ngjarje të sotme po e tregon dukshëm afërsinë tonë… Ne po ashtu ndajmë edhe vlera të njëjta”, u shpreh Rohde.

Në anën tjetër, kryeministri i Kosovës, Albin Kurti është shprehur falënderues për ndihmën e Gjermanisë.

“Gjermania na ka njohur ndër vendet e para, mirëpo para se të na e njoh pavarësinë, Gjermania për neve është shteti në të cilin kanë gjetur strehë shumë shqiptarë nga Kosova në vitet e 70-ta, në vitet e 80-ta e më pastaj edhe shumë refugjatë nga vitet e 90-ta, qoftë kjo për shkak të okupimit apo luftës më pastaj. Në këto 15 vite të miqësisë ndërmjet Republikës sonë dhe asaj gjermane, ne kemi kujtimet më të mira nga mbështetja gjermane në sundim të ligjit, në arsim, në efiçiencë të energjisë dhe në infrastrukturë”, ka deklaruar Kurti, përcjellë albinfo.ch.