Rexhepi e Kosumi: Kemi bashkëpunuar me SHIK-un

Por ata kanë mohuar që shefi i SHIK-ut ka dhënë raporte periodike për aktivitetet e punës së organizatës

Dy ish-kryeministrat e Kosovës, Bajram Rexhepi dhe Bajram Kosumi, e kishin pranuar se ish-shefi i SHIK-ut, Kadri Veseli, ka qenë në zyrat e tyre, ani pse shërbimi sekret, të cilin e ka drejtuar nuk ka qenë i mbështetur në kornizat ligjore të pasluftës.

Por ata kanë mohuar që shefi i SHIK-ut ka dhënë raporte periodike për aktivitetet e punës së organizatës”, shkruan “Koha Ditore”. 

“Për koordinimin e punës sa më mirë, kam pasur disa kontakte me Kadri Veselin dhe e kam inkurajuar atë që të bashkëpunojë ngushtë me shërbimet e huaja. Kjo ka qenë e domosdoshme së paku për shkak të parandalimeve të aktiviteteve të Serbisë”, ka deklaruar ish-kryeministri Rexhepi. 

Nga ana tjetër, ish-kryeministri Kosumi nuk e fsheh faktin se personalisht ka ftuar Kadir Veselin në zyrën e tij. Për dallim nga Rexhepi, ai thotë të mos e ketë thirrur atë për të marrë ndonjë informacion sekret, por për të dëgjuar konceptin dhe vizionin e tij për themelimin e shërbimit inteligjent zyrtar të shtetit.