Rënie e madhe e numrit të infektimeve në Zvicër: Vetëm 28 në 24 orët e fundit

Zyra Federale e Shëndetit Publik (BAG) kishte raportuar 76 raste shtesë të hënën, dhe 88 të dielën

Në Zvicër dhe Lihtenshtajn, vetëm 28 njerëz janë infektuar me virusin e koronës brenda 24 orëve të fundit. Të kujtojmë: Zyra Federale e Shëndetit Publik (BAG) kishte raportuar 76 raste shtesë të hënën, dhe 88 të dielën.

Kjo është rënia më e madhe e numrit të infeksioneve të reja dhe vërteton trendin e uljes, i cili po vazhdon prej disa javësh, shkruan albinfo.ch

Sipas BAG, të hënën kishte gjithsej 30,009 raste infektimesh, të konfirmuara nga laboratori.

Numri i të vdekurve, sipas agjencisë së lajmeve Keystone-SDA të hënën pasdite ka qenë 1788 ndërsa sipas worldometters.info, 1784 dhe i të shëruarve, 25.200.

Keystone-SDA analizon të dhënat zyrtare të disponueshme në faqet e internetit të kantoneve dhe i riaktualizon ato dy herë në ditë, në mesditë dhe në mbrëmje.

BAG ndërkaq raporton se deri më tani në Zvicër kanë vdekur 1483 nga koronavirusi, transmeton albinfo.ch. BAG shkruan  po ashtun se në Zvicër ka 350 infeksione në 100,000 banorë, që është njëra nga shkallët më të larta të infektimit në Evropë.

Deri më tani në Zvicër janë kryer gjithsej 286.403 testime.  Sipas BAG, dymbëdhjetë për qind e tyre kanë rezultuar pozitive.

 

---