Rekord pas rekordi, rritet papunësia në Eurozonë

Eurozona shënoi rekordin e radhës të papunësisë gjatë muajit janar. Ajo arriti në 11.9%, duke shënuar një rritje me 0.1% në krahasim me muajin pararendës

Të dhënat e publikuara nga Eurostat tregojnë se në muajin e parë të këtij viti papunësia në hapësirën e Eurozonës arriti në 11.9%, duke shënuar një rritje me 0.1% në krahasim me muajin pararendës. Në janar numri i të papunëve arriti në 19 milionë, rreth 200 mijë më shumë se dhjetorin e 2012-ës.

Rekordin për nivelin e papunësisë mes vendeve anëtare të Eurozonës e mban Greqia, për të cilën vlejnë ende të dhënat për nëntorin e 2012-ës, kur papunësia preku nivelin rekord prej 27%. Pas saj renditet Spanja, ku sipas të dhënave për janarin, papunësia arriti në 26.2%.

Për Spanjën është veçanërisht shqetësues niveli i papunësisë për personat nën 25 vjeç. 
Numri i tyre është 2 herë më i lartë se totali i të papunëve dhe arrin në 55.5%. 

Shqetësuese janë shifrat edhe për Italinë e sapodalë nga zgjedhjet e përgjithshme, rezultati i të cilave rrezikon të thellojë krizën. Papunësia arriti rekordin prej 11.7% në muajin janar, ndërsa 38.7% e të rinjve janë të papunë.

Ndër nivelet më të ulëta vazhdon të renditet papunësia në Gjermani dhe në Austri, përkatësisht me 5.3 dhe 4.9%. 

Për Gjermaninë ky është muaji i dytë që papunësia qëndron në këtë nivel, pas rënies me 0.1% gjatë nëntorit. 

Vlen për t’u përmendur fakti që gjatë 2012-ës Gjermania ka njohur vetëm rënie të nivelit të papunësisë me 0.2% në total. 

Megjithatë shumë ekspertë të ekonomisë fajësojnë masat antikrizë të kursimit të modelit gjerman për rritjen e papunësisë në Eurozonë. Niveli i inflacionit në Eurozonë ka arritur së fundi në 1.8%.