Rekord i temperaturave në ujërat zvicerane për shkak të valës ekstreme të nxehtësisë

(KEYSTONE/Sigi Tischler)

Për shkak të valës së nxehtësisë që ka përfshirë vendin gjatë dy javëve të fundit, temperaturat e ujërave të liqeneve zvicerane janë rritur ndjeshëm, duke thyer rekorde historike. Sipas shërbimit meteorologjik Meteonews, mesatarisht temperaturat e liqeneve janë rritur me 4 deri në 7 gradë krahasuar me mesataren e periudhës 1983-2024, shkruan RTS, transmeton albinfo.ch.

Në zonën frankofone, Liqeni i Gjenevës ka regjistruar 26 gradë, katër gradë mbi temperaturën mesatare të mesit të qershorit dhe pesë gradë më shumë se mesatarja 41-vjeçare. Liqenet Neuchâtel dhe Biel shënuan rritje prej rreth pesë dhe gjashtë gradësh përkatësisht, ndërsa Liqeni i Luganos arriti temperaturën më të lartë prej 28 gradësh.

Edhe Liqeni Walen në kantonet St. Gallen dhe Glarus tregoi rritje drastike prej 7 gradësh mbi mesataren historike. Ndërkaq, lumenjtë si Aare pranë Bernës, Reuss pranë Lucernës dhe Rajni pranë Laufenburgut regjistruan gjithashtu temperatura të larta të paprecedenta.

Meteorologët theksojnë se niveli i ulët i borës në male në fillim të sezonit ka kontribuar në këtë ngrohje të shpejtë të ujërave. Pasojat e këtyre temperaturave janë shqetësuese. Peshqit përballen me vështirësi në ujërat e ngrohtë, ndërsa rritja e algave blu-jeshile çon në uljen e përmbajtjes së oksigjenit dhe formimin e substancave toksike, duke kërcënuar ekosistemet ujore.

Meteonews paralajmëron se përkundër kësaj vale të nxehtësisë, priten ndryshime në mot gjatë fundjavës dhe në fillim të javës së ardhshme, të cilat mund të ndikojnë në uljen e temperaturave ekstreme të ujërave, transmeton albinfo.ch.