Rekord i Postës zvicerane: 18.6 milionë paketa, për një muaj

Rekordi është arritur edhe falë numrit të madh të angazhimeve speciale që kanë marrë punonjësit, thuhet në një komunikatë të postës

Posta e Zvicrës gjatë muajit të fundit, deri në ditën e Krishtlindjes ka përpunuar më shumë se 18.6 milionë paketa. Ky numër paraqet rekord për Zvicrën dhe është për 8.8 për qind më i madh se ai i një viti më parë, shkruan srf.ch.

Rekordi është arritur edhe falë numrit të madh të angazhimeve speciale që kanë marrë punonjësit, thuhet në një komunikatë të Postës, transmeton albinfo.ch. Po ashtu ndikim në këtë rritje ka pasur edhe hapja e qendrës së re regjionale të paketave në Kantonin e Tiçinos.

Ndërkaq për “valën” e madhe të paketave kanë kontribuuar në veçanti aksionet si “Black Friday” dhe “Cyber Monday” si dhe blerja online gjithnjë në rritje.

Gjatë javëve të fundit, shumë punë kanë pasur edhe postierët, bartës të letrave, përcjell albinfo.ch.  Ata kanë dërguar mesatarisht nga 16 milionë letra në ditë, të cilat janë përpunuar në qendrat përkatëse të postës.

Në mesin e tyre llogariten edhe më shumë se 106.000 dërgesa të vogla mallrash nga bota. Më shumë se dy të tretat e tyre vinin nga Azia.

---