Rekord i Doganës së Kosovës, 702 milionë euro për 9 muaj

Dogana e Kosovës nga fillimi i vitit e deri më sot ka grumbulluar mbi 700 milion euro, ose 30 milionë më shumë se në vitin 2013

Duke vazhduar performancën e mirë në grumbullimin e të hyrave, Dogana e Kosovës sipas raportit të fundit financiar ka tejkaluar nivelin rekord në mbledhjen e të hyrave pasi deri më sot ka mbledhur 702.6 milion euro.

Nga janari 2014 e deri më sot dogana ka kaluar shifrën prej 700 milion euro të mbledhura. Krahasimi i të hyrave të këtij viti me vitin paraprak tregon rritje prej afër 30 milion euro, pasi që vitin e kaluar (2013) Dogana kishte mbledhur në këtë periudhë 673 milion euro, thuhet në një komunikatë të Doganës së Kosovës.

Dogana e atribuon performancën më të mirë tek disa faktorë kyç siç janë, reforma e suksesshme e administratës doganore, rritja e vetëdijes nga bizneset, rritja e disiplinës dhe masave anti-korrupsion, si dhe asistenca e ofruar nga qytetarët në lajmërimin e rasteve të kontrabandës dhe korrupsionit. Dogana pret që deri në fund të këtij viti të arrijë mbi 900 milion euro të hyra që paraqesin shifrën në të lart të mbledhur ndonjëherë që nga themelimi i doganës.

Me këtë rast Dogana e Kosovës kërkon nga qytetarët që ta ndihmojnë në lajmërimin e rasteve të kontrabandës dhe korrupsionit përmes thirrjeve pa pagesë në 0800 50 095.