Reduktohen kolonat, pritjet deri 1 orë

Sipas Policisë së Kosovës, pritjet gjatë ditës së sotme janë reduktuar, edhe pse në Merdarë dhe tek Dheu i Bardh, kolonat kanë qenë deri 1 kilometër

Kthimi i mërgimtarëve në vendet e tyre të punës, po shkakton kolona të gjata në pikëkalimet kufitare Kosovë-Serbi. Sipas të dhënave zyrtare të Policisë së Kosovës, pritjet gjatë ditës së sotme janë reduktuar, edhe pse në Merdarë dhe tek Dheu i Bardh kolonat janë rreth 1 kilometër.

“Ju informojmë se situata sa i përket pritjeve është përmirësuar. Pritjet janë më të shkurtra, varësisht prej frekuentimit të automjeteve të qytetarëve të cilët po kthehen në shtetet e ndryshme të Evropës”, thuhet në njoftimin e Policisë.

Qarkullimi në pikën kufitare në Merdarë, sipas të njëjtit njoftim, po zhvillohet pa problem, përderisa kolona në dalje janë deri në 1 orë. Por, sipas policisë varësisht prej frekuentimit të automjeteve kolona nganjëherë arrin deri në 1 km dhe pritjet zgjasin kohë pas kohe deri ne 1.30 min.

“Policia e Kosovës në këtë rast Departamenti i Policisë Kufitare ende vazhdon me shtim të personelit policor dhe aplikimit të punës së kontrollit kufitar të përshpejtuar, me të vetmin qëllim të shmangies së pritjeve të gjata dhe të ju mundësojë qytetarëve kalim më të shpejtë të kontrollit kufitar”, thuhet në njoftim.

Sipas Policisë, te Dheu i Bardhë kolonat gjatë ditës kanë shkuar deri 1 km dhe pritjet zgjasin deri në 1 orë. Në Muçibabë nuk ka pritje fare dhe qarkullimi i automjeteve zhvillohet normalisht, po ashtu as në Mutivodë nuk ka pritje më shumë se 10 ose 15 min.

Edhe në pikëkalimet kufitare të veriut, Jarinje dhe Bërnjak, qarkullimi i automjeteve zhvillohet pa problem, ndërsa pritje nuk ka.