Reagon Lunaçek: Udhëheqësit politikë në Kosovë të shmangin çdo akt të dhunës

Për shpërthimin e dhunës nëpër rrugët e Prishtinës dhe bllokadën e institucioneve, dje ka reaguar në “Twitter” edhe Ministri i Punëve të Jashtme i Austrisë, Sebastian Kurz

Nënkryetarja dhe raportuesja për Kosovën në Parlamentin Evropian, Ulrike Lunaçek, ka reaguar ndaj përshkallëzimit të situatës dhe protestave të dhunshme gjatë ditëve të fundit në Kosovë. Ajo ka thënë se opozita duhet të presë vendim e Gjykatës Kushtetuese në janar dhe deri atëherë duhet të funksionojë parlamenti.

“Unë nuk dua që përfaqësuesit e opozitës dhe të qeverisë të vazhdojnë ta përshkallëzojnë situatën edhe më shumë. Unë ua kujtoj partive opozitare në Kosovë traditën e mirë të protestave paqësore”, raporton “ots.at”, përcjell “albinfo.ch”

“Tash gjithçka është në dorën e Gjykatës Kushtetuese dhe duhet të presin deri në janar për të kuptuar vendimin. Deri atëherë partitë opozitare duhet të bëjnë punën e tyre si pjesë e parlamentit. Për shembull, përgatitja e buxhetit, i cili përfundimisht duhet të përmirësoj situatën sociale dhe ekonomike në këtë vend”, ka thënë ajo.

Për shpërthimin e dhunës nëpër rrugët e Prishtinës dhe bllokadën e institucioneve, dje ka reaguar në “Twitter” edhe Ministri i Punëve të Jashtme i Austrisë, Sebastian Kurz.

“I shqetësuar për situatën në Kosovë. Pengimi i dhunshëm i punës në Parlamentin e Kosovës është i papranueshëm”, ka shkruar Kurz. Ai ka bërë thirrje që të gjenden zgjidhje politike për tejkalimin mosmarrëveshjeve. “Mosmarrëveshjet politike të zgjidhen politikisht, jo me gaz lotsjellës dhe gurë”, ka shkruar Kurz.