Ratifikohet marrëveshja kulturore Maqedoni-Kosovë

Marrëveshja paraqet kornizë juridike për vendosjen e bashkëpunimit të drejtpërdrejt në mes institucioneve kulturore në mes dy vendeve

Qeveria e Maqedonisë në mbledhjen e fundit ka miratuar Propozim-Ligjin për Ratifikimin e Marrëveshjes për bashkëpunim kulturor me Republikën e Kosovës.

Me këtë marrëveshje, dy vendet forcojnë bashkëpunimin nçë të gjitha sferat kulturore dhe ato të trashëgimisë.

Zëdhënësi i Qeverisë së Maqedonisë, Muhamet Hoxha tha se kjo marrëveshje u nënshkrua në muajin shkurt të këtij viti nga ana e dy ministrave të kulturës në Prishtinë, mirëpo nuk është ratifikuar akoma nga Kuvendi i Maqedonisë, për t’u bërë e plotfuqishme.

“Marrëveshja në fjalë paraqet kornizë juridike për vendosjen e bashkëpunimit të drejtpërdrejt në mes institucioneve kulturore në mes dy vendeve, me qëllim të këmbimit të pasurisë kulturore që është në funksion të afrimit të popujve të të dy vendeve”, deklaroi ai, raporton INA.

Me këtë marrëveshje, sipas tij, definohen format dhe lëmit e bashkëpunimit, këmbimi i ekspertëve, lëmit në të cilat do të mbështetet vendosja e kontakteve direkte, pjesëmarrja në seminare, konferenca në lëmin e botimeve, dhe kështu me radhë… etj.

“Po ashtu me marrëveshje nxitet bashkëpunimi në mes të rinjve, nëpërmjet të cilave do të determinohen mundësit për prezantim të pasurisë kulturore të të dy vendeve”, theksoi me tej Hoxha.

Sipas tij, ratifikimi i kësaj marrëveshje thellon bashkëpunim e mirë në mes dy vendeve. Maqedonia dhe Kosova pas vendosjes së marrëdhënieve diplomatike kanë nënshkruar dhe ratifikuar më shumë se 25 marrëveshje, në shumë sfera qofshin politike, juridike apo ekonomike e kulturore.