Rama nuk heq dorë nga ministri i Brendshëm, tejkalon Presidencën

Ditën e martë do të mbahet seanca parlamentare në Shqipëri për të votuar shkarkimin e Fatmir Xhafajt nga posti i ministrit të Brendshëm.

Seanca do të fillojë në orën 10:00, kur edhe përfundon afati për dekretin për shkarkimin e Fatmir Xhafajt.

Mediat në Shqipëri raportojnë se Sander Lleshi do të emërohet zëvendësministër i Brendshëm, ku do t’i delegohen kompetencat e ministrit të Brendshëm.

“Dakordësi e plotë në Grupin Parlamentar. Kuvendi do të miratojë nesër dekretin e Presidentit për shkarkimin e ish-ministrit të Brendshëm. Sandër Lleshi do të marrë drejtimin e Ministrisë si zëvendësministër. Por nuk mbaron me kaq. Për më shumë do t’i drejtohem Kuvendit nesër në 10.00”, shkruan Rama në Twitter.

Rama nuk do të çojë një emër tjetër në Presidencë, por në tryezën e Metës do të vijojë të jetë emri i Sandër Lleshit, deri kur kreu i shtetit të krijojë bindjen për dekretimin e tij.

Presidenti Meta ende nuk e ka dekretuar emrin e ministrit të ri, ndërsa të dielën ka pasur një takim me urgjencë me kryeministrin Rama.