Rama: Air Kosova do të operojë në aeroportin e Kukësit

Kryeministri Edi Rama njoftoi sot nga Aeroporti i Vlorës se së shpejti në Kukës do të nisë fluturimet kompania e re ajrore “Air Kosova”.

Ky lajm u dha sot, pikërisht kur u realizua fluturimi i parë certifikues në Aeroportin Ndërkombëtar të Vlorës.

Biznesmeni Behgjet Pacolli zbriti në pistën e aeroportit të Vlorës, ku u prit nga kryeministri Edi Rama.

“Për ata që thonë se ky është fluturim ‘fake’ që bëhet për propagandë dhe pastaj aeroporti do të mbetet si Kukësi. Ai aeroport ka pasur sfidë më vete për sigurimin e operatorëve, ka problematikë me korridorin e uljes, nuk është aeroport i thjeshtë. Nuk është gjetur në kohë një “akullthyes” që do të dëshmojë se ai aeroport ia vlen.

“Një kompani e re shqiptare do të nisë së shpejti në aeroportin e Kukësit, për të mos i ndalur më. “Air Kosova” do të jetë kompania tjetër shqiptare, këta dy avionë do të jenë avionët e krenarisë tonë të përbashkët. Për ta vërtetuar kam sjellë me vete edhe certifikatën që mos më thonë është Photoshop, është regjistruar që në muajin janar. Kompania po punon për të siguruar avionët dhe për nisur nga operacionet në territor”, tha Rama.