Qytetarët serbë kërkojnë shtyrjen e afatit për ndërrimin e targave

Drejtoria e Policisë së Kosovës ka dërguar në Ministrinë e Punëve të Brendshme të Kosovës kërkesën e qytetarëve serbë të Kosovës për shtyrjen e afatit për riregjistrimin e automjeteve me targa serbe në ato kosovare.

“Pres që shpejt të marrim përgjigje nga MPB-ja. Presim një përgjigje pozitive”, ka thënë drejtori për rajonin e veriut, Veton Elshani për Radio Evropën e Lirë.

Bëhet fjalë për riregjistrimin e automjeteve me targa të lëshuara nga autoritetet serbe me akronimet e qyteteve të Kosovës, si KM (Kosovska Mitrovica), GL (Gjilan), PR (Prishtina) e kështu me radhë.

Plani i Qeverisë së Kosovës i tetorit të vitit të kaluar parashihte që nga 21 prilli 2023 të lejohet qarkullimi i automjeteve vetëm me targa RKS.

Veton Elshani ka sqaruar se Policia e Kosovës nuk ka shqiptuar gjoba për qytetarët pas skadimit të afatit për riregjistrim për shkak se ka qenë “çështje politike”, dhe rikujton se procesi i riregjistrimit është pezulluar.

“Tani e kemi përsëritur kërkesën, nëse ka mundësi të përsëritet (procesi i riregjistrimit)”, shton ai, përcjell albinfo.ch.