Qeveria propozon ashpërsim masash por jo mbyllje

Kantonet tani kanë kohë deri të martën, më 14 dhjetor, për të komentuar lidhur me këtë. Është ende e paqartë se kur Këshilli Federal do të vendosë përfundimisht për masat e propozuara

Këshilli Federal duke synuar forcimin e mëtejmë të masave kundër koronës, në mbledhjen e tij të sotme në thelb ka vendosur të sugjerojë dy variante.

Varianti  1
2G: 2G do të praktikohet kudo ku ekziston detyrimi për certifikatë 3G sot (në kinema, restorante, qendra fitnesi), transmeton albinfo.ch. Ata që janë të pavaksinuar pra nuk do të kenë më fare qasje. Edhe aty ku zbatohet rregullorja 2G, maskat duhet të vihen përsëri. Ngrënia dhe pirja duhet të bëhen vetëm ulur.

2G +: Baret, klubet dhe qendrat e fitnesit gjithashtu duhet të jenë në gjendje t`i përmbahen rregullores 2G +. Në këtë rast edhe ata që janë shëruar dhe që janë vaksinuar do të kenë nevojë gjithashtu për një test negativ për Covid. SI “shpërblim”, për ta do të hiqet detyrimi i maskës dhe uljes në tavolinë për të konsumuar.

Varianti 2
2G: 2G do të zbatohet kudo ku sot ekziston detyrimi për certifikatë 3G. Ata që janë të pavaksinuar nuk do të kenë më akses. Edhe aty ku zbatohet 2G, maskat duhet të vihen përsëri. Vendet ku kjo nuk është e mundur do të mbyllen. Kjo vlen veçanërisht për zonat e brendshme të restoranteve, diskove, pishinave të mbuluara dhe qendrave të fitnesit.

Përveç këtyre varianteve, Këshilli Federal propozon edhe disa “masa bazë”.

Takime private: maksimumi 30 persona në hapësira të brendshme, maksimumi 50 persona, në ato të jashtme. Nëse një person i pavaksinuar është i pranishëm në takimet e brendshme, numri maksimal i pjesëmarrësve është i kufizuar në 5 persona.

Arsimi: Detyrimi për maskë në shkolla nga niveli i mesëm i lartë, mësim në distancë në universitete dhe kolegje teknike

Puna: Zyra e detyrueshme nga shtëpia (Home Office)

Kantonet tani kanë kohë deri të martën, më 14 dhjetor, për të komentuar lidhur me këtë. Është ende e paqartë se kur Këshilli Federal do të vendosë përfundimisht për masat e propozuara.

Ndërkohë, presidenti Parmelin dhe ministri i shëndetësisë, Berset janë duke ju përgjigjur pyetjeve të gazetarëve lidhur me masat e reja të pandemisë, në konferencën për media, që po mbahet këto çaste në Bernë.

---