Qeveria paralajmëron qytetarët: Kujdes, mos shkoni në Shengen për punë pa viza për punësim

Qeveria e Kosovës i ka paralajmëruar qytetarët që të mos shkojnë për punësim apo studime në zonën Schengen nëse nuk janë të pajisur me viza, përcjell albinfo.ch.

Tashmë qytetarët e Kosovës prej 1 janarit janë të lirë të udhëtojnë pa viza në zonën Schengen.

Në kuadër të kësaj, Integrimi Evropian i Kosovës ka njoftuar qytetarët që të kenë kujdes, pasi me udhëtimin pa viza, qytetarët mund të bëjnë vetëm vizita të shkurtra turistike.

Kur qytetarët duan të lëvizin në zonën Schengen për studime apo për punësim, qeveria bën të ditur se atyre iu nevojiten viza nga ambasadat përkatëse.

“Kujdes: Pa vizë mund të bëni vizita të shkurtra turistike e te të afërmit, por jo për punësim apo studime në zonën Schengen. Për studime afatgjata dhe punësim, ju duhet viza nga ambasadat përkatëse, e të cilat paraqesin pastaj bazën që ju të pajiseni atje me leje qëndrim (Residence Permit)”, thuhet tutje në njoftim.