Qeveria miraton projektligjin për vlerat e luftës

Kjo ka ndodhur pak çaste para se ish luftëtarët e UÇK-së që po bënin grevë, të hynin në një protestë të përgjithshme

Në një mbledhje të jashtëzakonshme të mbajtur sot, Qeveria e Kosovës ka miratuar projektligjin për vlerat e luftës. Kjo ka ndodhur pak çaste para se ish luftëtarët e UÇK-së që po bënin grevë prej 61 ditësh të përshkallëzonin grevën e tyre në një protestë të përgjithshme.

Grevistëve lajmin e gëzuar ua ka kumtuar Adem Grabovci, shef i grupit parlamentar të PDK-së në Kuvendin e Kosovës.

Me këtë rast, kryetari i këshillit grevist ka shpallur përfundimin e grevës.

Kryeministri i vendit, Hashim Thaçi me rastin e miratimit ka thënë se me miratimin e këtij Projektligji, Qeveria e vendit po bën gjënë më të vogël që duhet bërë për kategoritë e luftës. Ai shtoi se ligji është më bashkëkohori dhe më i miri në rajon.

Më tej, u bë e ditur se miratimi i Projektligjit për vlerat e luftës bëhet në harmonizim të plotë me Fondin Monetar Ndërkombëtar.