Qëndresa, në mes të këngës dhe furrës së bukës

Derisa rruga deri te suksesi i vërtetë në muzikë është ende e gjatë, ajo "jeton dy jetë": të punëtores së furrës "Gabriel" dhe të këngëtares

Qëndresa Rexhallari është nxënëse 19 vjeçare që ndjek mësimin e zejes në një furrë buke dhe ëmbëlsirash në Glarus. Por kjo nuk është e gjithë jeta e saj: Qëndresa, në rrethin e kantonit të saj dhe më gjerë është e njohur edhe si këngëtare me perspektivë. “Electrogirl” është ofiqi i saj si këngëtare.

Por, derisa rruga deri te suksesi i vërtetë në muzikë është ende e gjatë, ajo “jeton dy jetë”: të punëtores së furrës “Gabriel” dhe të këngëtares.

Se duke shitur bukë nuk bëhesh e pasur, Qëndresa e ka ditur me kohë. Për këtë arsye ajo, jashtë furrës, po bën plane të mëdha për suksesin në muzikë.

Kosovarja planifikon të depërtojë në skenën e madhe si dhe të mund të jetojë si këngëtare. “Kjo është ëndrra ime nga fëmijëria”, thotë ajo dhe ia hedh një vështrim babait, Ruzhdiut aty pranë. “Im atë është edhe menaxheri im, i cili më ka mbështetur financiarisht dhe motivuar drejt realizimit të qëllimit tim”, shkruan gazeta “Südostschweiz”.